FJALË ZEMRE PËR PËR KËTË LIBËR TË RRALLË

Tregime brilante, me bukuri fantastike, të shkruara mjeshtërisht.
Këto janë fjalët e para që mund të thuhen për këtë përmbledhje tregimesh të larmishme, me ngjarje të rralla, të qëmtuara me aq kujdes e të trajtuara artistikisht, me një realizëm tronditës, fantazi befasuese dhe forcë të madhe bindëse, nga shkrimtari i talentuar Vullnet Mato.
Tema e dashurisë, e marrëdhënieve midis çifteve, përdhunimet dhe pabesitë bashkëshortore, problemet e mëdha të qelizës së sotme dhe të djeshme të shoqërisë shqiptare, janë disa nga motivet e trajtuara në faqet e këtij libri me tematikë tejet të larmishme. Identiteti i dukshëm, niveli i lartë artistik dhe synimi i qartë ideoestetik, vihen re te subjektet e të gjitha ngjarjeve. Madje kjo duket qartë edhe te skenat e shpeshta të seksit, të cilat nuk bëhen asnjëherë si qëllim në vetvete, por vihen në funksionin organik të idesë. Dhe duke i trajtuar shkoqur e realisht marrëdhëniet midis sekseve, dikur tabu për t’u shkruar, autori na jep mesazhin se ato përbëjnë në çdo kohë një problem të rëndësishëm shoqëror, nga i cili burojnë shumë drama dhe fatkeqësi familjare, për të cilat letërsia artistike duhet patjetër të thotë fjalën e saj të fuqishme. Përkufizimi i këtij mendimi shprehet qartësisht edhe te kjo frazë: “Asnjëherë nuk e kam kuptuar, përse njeriu me logjikë normale, për pak sekonda epsh, arrin deri aty, sa të humbasë jetën e tij, të të tjerëve dhe të shkatërrojë ekuilibrat harmonik të vendosur midis njerëzve me aq mundim.”
Edhe në këtë botim të ri, pena e këtij shkrimtari të afirmuar, të kërkuar nga lexuesi e të vlerësuar nga kritika, shquhet për vizionin e kthjellët të pasqyrimit, stilin e veçantë dhe bukurinë narrative. Cilësi këto, me të cilat ai të rrëmben qysh në faqet e para dhe s’të lë t’i heqësh sytë nga libri për asnjë çast, derisa t’i shkosh faqes së fundit, sikur të jeshë duke rrëshqitur me një slitë. Me aftësinë për të depërtuar shkathtësisht në psikologjinë e personazheve të shumtë, ai arrin të futet thellë në të gjitha skutat e intimiteve jetësore të tyre, duke zbuluar ndjesi tepër të holla, për të na sjellë rrezatime psiqike tejet interesante. Dhe kësisoj, me një fuqi të habitshme, gati mistike, të bën të qeshësh, të qash, të entuziazmohesh e të mendohesh thellë.
Me leximin e këtij libri qysh në dorëshkrim, kam përjetuar çaste emocionale tejet të këndshme dhe jam ndjerë i lumturuar. Jo vetëm se më ka krijuar mjaft refleksione pozitive e mendimnxitëse, por edhe se më ka lartësuar krenarinë kombëtare, me zbulimin dhe ndriçimin e disa cilësive aq interesante nga bota shpirtërore e popullit.
Dhe për më tepër, nga ana profesionale, unë shoh qartë në këtë përmbledhje tregimesh, se si shkrimtari me aftësi njohëse të gjera, arrin që në laboratorin e vet krijues, mineralin jetësor të përzier me dhera e gurishte të panevojshme, ta kthejë në flori të pastër, për të zbukuruar gjerdanin e ndritshëm të letërsisë shqipe.
Urime! Shumë urime dhe begati krijuese të mëtejshme për autorin e palodhur!
Shefki KARADAKU - shkrimtar